Blazers hinarang ng Knights

MANILA, Philippines — Dinungisan ng reigning champion Colegio de San Juan de Letran ang rekord ng College of Saint Benilde sa pamamagitan ng 81-75 desisyon upang makabalik sa porma sa National Collegiate Athletic Association (NCAA) Season 98 men’s basketball kahapon sa The Arena sa San Juan City.

Nagpasabog si Brent Paraiso ng 25 points at apat na steals para pamu­nuan ang Knights na makuha ang ikalawang panalo sa tatlong laro.

Magandang resbak ito para sa Letran na yumuko sa Arellano University sa kanilang huling laro noong Linggo.

“I challenged the boys to not allow what happened in our game against Arellano to happen here,” ani Knights head coach Bonnie Tan.

Solido ang suporta ni Fran Yu na naglista ng 12 points, siyam na rebounds, anim na assists at anim na  steals habang nagdagdag si Paolo Javillonar ng 10 markers, limang boards at dalawang assists.

Nagbigay din ng kontribusyon si Kobe Monje na may 10 points at dalawang assists gayundin si Kurt Reyson na may anim na puntos, walong rebounds, tatlong assists at dalawang steals para sa Knights.

Ito ang unang kabiguan ng Blazers para mahulog sa 3-1 baraha.

Nasayang ang pagsisikap ni Will Gozum na umiskor ng double-double na 23 points at 10 rebounds.

Samantala, kinansela ng NCAA management committee ang laro ng Lyceum of the Philippines University at San Sebastian College - Recoletos (SSC-R) ngayong hapon dahil sa safety and health protocols.

Anim na miyembro ng Golden Stags ang isinailalim sa health and safety protocols sa loob ng pitong araw.