Creamline haharap sa matinding hamon sa AVC Cup

MANILA, Philippines — Mapapalaban ng husto ang reigning PVL Open Conference at Invitational Conference champion Creamline sa 2022 Asian Women’s Volleyball Cup na papalo mula Agosto 21 hanggang 29 sa Philsports Arena sa Pasig City.

Matinding laban ang haharapin ng Cool Sma­shers dahil kasama nito sa Pool A ang powerhouse China, South Korea, Iran at Vietnam.

Sa opening day bukas, makakasagupa ng Cool Smashers ang Southeast Asian Games silver me­dalist Vietnam sa alas-7 ng gabi.

Sunod nitong makakalaban ang reigning AVC Cup champion China sa Agosto 23 sa alas-7 ng gabi gayundin ang Iran sa Agosto 24 (alas-7 ng gabi) at ang South Korea sa Agosto 25 (alas-7 ng gabi).

Nasa Pool B naman ang Australia, Japan, Chinese-Taipei at SEA Games champion Thailand.

Ang apat na mangu­ngunang koponan sa bawat pool ang aabante sa knockout quarterfinal stage na magsisimula sa Agosto 27.

Target ng Cool Sma­shers na malampasan ang ninth-place finish ng Pilipinas sa naturang torneo noong 2018 na ginanap sa Nakhon Ratchasima, Thailand.

Kaya naman pukpukan na ang ensayo ng Creamline para masiguro na handang-handa ito bago sumabak sa asian meet.

Nakuha ng Cool Sma­shers ang karapatang ma­ging kinatawan ng bansa sa AVC Cup matapos magkampeon sa katatapos na Premier Volleyball League (PVL) Invitational Confe­rence kamakailan.

Ipaparada ng Cool Smashers si two-time PVL MVP Tots Carlos kasama sina veteran outside hitter Alyssa Valdez, Invitational Conference Finals MVP Celine Domingo, Jema Galanza, Jeanette Panaga at playmaker Jia Morado.

Aminado si Valdez na haharap sa matinding pagsubok ang kanilang tropa ngunit magandang pagkakataon ito para sa Cool Smashers na mas mapataas pa ang lebel ng paglalaro nito.