Do-or-die games sa D-League

MANILA, Philippines — Tanging dalawang koponan lamang ang mag-aagawan para sa korona ng 2022 PBA D-League Aspirants Cup.

Lalabanan ng EcoOil-La Salle ang Adalem Construction-St. Clare ngayong alas-11 ng tanghali kasunod ang salpukan ng Marinerong Pilipino at Apex Fuel-San Sebastian sa ala-1 ng hapon sa ‘winner-take-all’ Game Three ng kanilang mga semifinals series sa Smart Araneta Coliseum.

Humirit ang Saints ng ‘do-or-die’ game matapos agawin ang 72-64 panalo sa Green Archers sa Game Two sa likod nina Johnsherick Estrada at Joshua Fontanilla.

“Gusto namin laging manalo kaya kahit mahirap, gagawa at gagawa kami ng way,” ani Adalem-St. Clare coach Jinino Manansala.

Tumabla rin ang Apex Fuel-SSC sa Marinero matapos kunin ang 82-74 panalo sa Game Two.