McCullough out na sa radar ng SBP?
MANILA, Philippines — Naglabas ng saloobin si dating San Miguel Beer import Chris McCullough na tila wala na ito sa radar ng Samahang Basketbol ng Pilipinas (SBP) para maging naturalized player.
Ayon kay McCullough, wala nang nakikipag-usap sa kanya patungkol sa naturalization.
Ito ang sagot ni McCullough nang tanungin ito ng isa sa kanyang followers sa social media.
“At this point, I don’t even get recognized,” ani McCullough.
Matatandaang inihayag ni McCullough na interesado itong maging naturalized player ng Gilas Pilipinas.
Makailang ulit itong pinost ni McCullough sa kanyang mga social media accounts dahil sanay na ito sa kultura ng Pilipinas.
Kabisado na rin ni McCullough ang estilo ng paglalaro ng mga Pinoy cagers kaya’t hindi na magiging madali ang chemistry para sa kanya.
Subalit inihayag kamakailan ng SBP na ilan sa mga tinatarget nito para sa naturalization sina Micah Potter, D.J. Wilson at Noah Vonleh.
Sa kabilang banda, nagtamo ng anterior cruciate ligament (ACL) tear si McCullough habang naglalaro ito para sa New Taipei Kings sa Taiwan basketball league noong Marso.
Ito ang isa sa posibleng mga naging dahilan sa pagkakasibak ni McCullough sa listahan ng mga kandidato.
- Latest