Estrada PBAPC D-League Player of the Week
MANILA, Philippines — Kinilala si Johnsherick Estrada bilang Cignal Play-PBA Press Corps D-League Player of the Week matapos igiya ang Adalem Construction-St. Clare sa panalo sa Game Two laban sa EcoOil-La Salle sa 2022 PBA D-League Aspirants’ Cup semifinals series noong Biyernes.
Humataw ang 20-anyos na NAASCU MVP ng 22 points, 6 rebounds, 3 assists, 2 blocks at 1 steal sa 72-64 pagdaig ng Saints sa Green Archers para itabla sa 1-1 ang kanilang best-of-three showdown.
Magtutuos ang dalawang koponan sa ‘winner-take-all’ Game Three bukas para sa Finals berth.
“Nag-ensayo lang kami nang maayos. Sinunod lang namin iyong mga tinuro ni coach (Jinino Manansala) at ibinigay lang namin iyong best namin,” sabi ni Estrada.
Tinalo ni Estrada para sa weekly citation sina Ichie Altamirano ng Apex Fuel-San Sebastian at Juan Gomez de Liaño ng Marinerong Pilipino.
Sa dalawang laro sa semifinals ay kumamada ang Adalem-St. Clare standout ng mga averages na 18.0 points, 6.5 rebounds at 3.5 assists.
Si Estrada ang inaasahang muling aasahan ng Saints sa pagsagupa sa Green Archers ni mentor Derrick Pumaren.
- Latest