Saints sinibak ang Tigers papasok sa semis
MANILA, Philippines — Humakot si NAASCU MVP Johnsherick Estrada ng 20 points, 5 rebounds at 3 assists sa paggiya sa No. 3 Adalem Construction-St. Clare sa 90-87 pagsibak sa No. 6 Builders Warehouse-UST, 90-87, papasok sa 2022 PBA D-League Aspirants’ Cup semifinal round kahapon sa Smart Araneta Coliseum.
Nag-ambag si Jolo Sumagaysay ng 14 points sa pagpapatalsik ng Saints sa Growling Tigers sa kanilang quarterfinals knockout match.
Sasagupain ng Adalem-St. Clare ang No. 2 EcoOil-La Salle at haharapin ng No. 1 Apex Fuel-San Sebastian ang No. 4 Marinerong Pilipino sa best-of-three semifinals series na magsisimula bukas.
“Hats off to UST. I know they will play hard and they know how to win already,” ani Saints’ coach Jinino Manansala sa Growling Tigers.
Nakabangon ang Builders Warehouse-UST mula sa 12-point deficit, 70-82, sa huling apat na minuto ng fourth quarter para makadikit sa Adalem-St. Clare sa 87-90 sa nalalabing 15.6 segundo sa fourth period.
Nagkaroon ang Saints ng five-second inbound violation, subalit hindi naipasok ni Kevin Baclaan ang kanyang desperadong three-point attempt sa huli nilang posesyon.
- Latest
