Tanso kinuha ni Obiena
MANILA, Philippines — Hindi na naman nagpahuli si World No. 3 pole vaulter Ernest John Obiena laban sa mga world record-holder at Olympic Games medalists.
Inangkin ni Obiena ang bronze medal matapos lumundag ng 5.73 meters sa prestihiyosong Silesia Diamond League sa Poland kahapon.
Sinubukan ng Asian at Southeast Asian Games record-holder na talunin ang 5.83, ngunit bigo siya sa tatlong attempts.
Nauna nang naglista si Obiena ng 5.94m sa pagkopo sa tansong medalya sa nakaraang World Championships sa Eugene, Oregon, USA.
Sa Silesia leg ay tinalo ng 6-foot-2 Pinoy pole vaulter sina Tokyo Olympics silver medalist Christopher Nilsen ng United States at 2016 Rio Games gold winner Thiago Braz ng Brazil.
Nagtala si Nilsen ng 5.53m para sa fifth place, habang hindi naman nalundag ni Braz ang 5.53m sa kanyang tatlong attempts.
Si world champion at record-holder Armand Duplantis ng Sweden ang umangkin sa gintong medalya sa kanyang bagong meet mark na 6.10m.
Binura ni Duplantis ang 5.91m ni dating Olympic champion Renaud Lavillenie ng France na itinala niya noong 2017 edition.
Sinikwat ni Norwegian Sondre Guttormsen ang pilak sa kanyang 5.73m na kinuha niya sa unang attempt kumpara sa tatlong attempts ni Obiena.
- Latest