Louie Alas magbabalik sa NCAA?
MANILA, Philippines — Maugong ang pagbabalik ni Louie Alas matapos ang ilang taong pagliban bilang basketball coach.
May balitang nasa listahan ang 58-anyos na si Alas sa mga napipisil ng San Beda College para hawakan ang Red Lions sa susunod na season.
Nabigong makapasok sa final four ang Mendiola-based squad, San Beda sa katatapos na season 97 kaya marahil ay naghahanap sila ng bagong hahawak ng kanilang basketball program.
Wala pa naman opisyal na anunsyo ang San Beda kung mananatiling head coach si Boyet Fernandez, subalit may mga “Marites” na mapapaso ang dalawang taong kontrata nito sa katapusan ng season.
Kilalang matikas na coach si Alas, inakbayan nito ang Letran Knights sa tatlong kampeonato sa NCAA, (1998, 2003, 2005).
Naging head coach din sa PBA ang premyadong mentor kaya inaasahang malaki ang maitutulong nito sa San Beda para bumalik sa finals at makasungkit muli ng titulo.
Bukod kay Alas, isa pang dating Letran Knights player na si Aldin Ayo ang isa pang napipisil ng San Beda para maging coach.
Para kay Alas, interesado siyang humawak muli ng local college basketball.
- Latest
