Serrano, JGDL nakapirma na
MANILA, Philippines — Hinirang si Encho Serrano bilang MVP sa PBA Draft Combine.
Ngunit walang PBA teams ang pumili kay Serrano sa first round ng PBA Rookie Draft bago siya nahugot ng Phoenix bilang No. 19 overall pick.
Kahapon ay tuluyan na siyang pinapirma ng Fuel Masters sa isang one-year contract bago ang pagbubukas ng PBA Season 47 Philippine Cup sa Hunyo 5.
Impresibo ang ipinakita ng dating La Salle Green Archers guard sa nakaraang PBA 3x3 tournament suot ang uniporme ng Barangay Ginebra.
Inaasahang makakatulong si Serrano sa backcourt rotation ng Phoenix na binubuo nina Matthew Wright, RJ Jazul at RR Garcia.
Lumagda naman si No. 8 selection Javi Gomez de Liaño sa isang two-year deal sa Terrafirma.
Ang Ginebra ang kumuha kay Gomez de Liaño sa draft bago nai-trade sa Terrafirma kasama si Brian Enriquez kapalit ni No. 2 pick Jeremiah Gray.
Samantala, pinapirma ng Meralco si guard Aaron Black sa isang two-year contract extension.
Maganda kasi ang inilaro ng anak ni head coach Norman Black sa nakaraang finals rematch ng Bolts at ng Gin Kings sa PBA Governors’ Cup.
Iginawad kay Black, ang 18th overall pick noong 2019 PBA Rookie Draft, ang Outstanding Rookie honors noong 2020 PBA Philippine Cup sa Clark bubble.
Sa nakaraang PBA Governors’ Cup Finals ay naging top local scorer ng Meralco ang dating kamador ng Ateneo Blue Eagles sa kanyang itinalang 16.83 points per game.
- Latest