2 golds nasikwat ng Pinoy triathletes
MANILA, Philippines — Patuloy ang dominasyon ng Pilipinas sa triathlon matapos walisin ang dalawang gintong medalyang nakataya sa 31st Southeast Asian Games sa Vietnam.
Humataw ng husto si Kim Mangrobang sa bike leg ng 1.5K swim, 40K bike at 10K run event upang matamis na kubrahin ang ikatlong sunod na gintong medalya sa women’s division.
Naitala ni Mangrobang ang 2:13.31 para pataubin si Indonesian Prasetyo Ingena, nagkasya lamang sa pilak na medalya.
“She (Mangrobang) had a great breakaway in the bike leg,” ani head coach George Vilog.
Nasiguro naman ni Pinay triathlete Raven Faith Alcoseba ang tansong medalya tangan ang 2:18:30.
Nakumpleto naman nina Fil-Spanish Fernando Tan Casares at Andrew Kim Remolino ang 1-2 finish para dominahin ang men’s division.
Nagsumite si Casares ng 1:56.57 samantalang umoras si Remolino ng 1:59.16. Nagkasya sa tanso si Ronald Bintang na naorasan ng 2:01:35.
Sa katunayan, nangunguna ang pambato ng Vietnam at Indonesia sa swim leg.
Subalit rumesbak sina Casares at Remolino sa bike at run legs para matamis na kubrahin ang ginto at pilak na medalya para sa Pilipinas.
- Latest
