Bolts pasok sa quarterfinals ng PBA 3x3
MANILA, Philippines — Inangkin ng Meralco ang quarterfinals berth matapos magposte ng 3-0 record sa Pool A sa Leg 5 ng PBA 3x3 Lakas Ng Tatlo kahapon sa Smart Araneta Coliseum.
Unang tinalo ng Bolts ang Platinum Karaoke, 21-19 bago isinunod ang Cavitex, 18-16, at NorthPort, Batang Pier 21-13.
Humataw si guard Tonino Gonzaga ng double figures sa dalawang panalo ng Meralco na naglaro na wala si injured big man Alfred Batino.
Nagtala naman ng magkaparehong 2-0 baraha ang Limitless App at Purefoods TJ Titans sa pool play.
Dinomina ng Appmasters ang Sista Super Sealers, 21-12, at ang guest team na Master Sardines, 21-15, sa Pool B.
Pinabagsak naman ng Titans ang San Miguel, 21-16, at TNT Tropang Giga, 21-15, sa Pool C.
Naghahangad rin ng quarterfinals spot ang 11 pang koponan tampok ang Terrafirma (1-1) na kinuha si veteran champion coach Joe Lipa.
Nakatakda ang final phase ngayon.
- Latest