NLEX, Meralco reresbak
MANILA, Philippines — Inaasahang sasagupain ng nagdedepensang Barangay Ginebra ang NLEX sa Game Two ng PBA Governors’ Cup semifinals series na wala si flying forward Japeth Aguilar.
Nagkaroon ang 6-foot-8 na si Aguilar ng right calf injury sa third period at hindi na nakabalik sa 95-86 pagresbak ng Gin Kings sa Road Warriors sa Game One noong Miyerkules.
“We don’t know how long or whether or not he’s gonna be back in the series or what at this point,” ani two-time PBA Grand Slam champion coach Tim Cone kay Aguilar.
Sisikapin ng Ginebra na maitayo ang 2-0 lead sa serye sa pagsagupa sa NLEX ngayong alas-3 ng hapon kasunod ang upakan ng Magnolia at Meralco sa alas-6 ng gabi sa MOA Arena sa Pasay City.
Inaasahan ni Cone na babalikan sila ng mga bataan ni mentor Yeng Guiao para maitabla ang kanilang best-of-five semis showdown.
Sina import Cameron Clark, Kevin Alas, JR Quiñahan, Don Trollano at Kris Rosales ang ibabandera ng NLEX.
Sa ikalawang laro, target din ng Hotshots ang 2-0 bentahe laban sa Bolts na kanilang pinadapa sa Game One, 94-80.
Bumangon ang Magnolia mula sa 17-point second quarter deficit para gibain ang Meralco.
“We need to address that problem. Mabuti na lang hindi masyadong lumaki lamang,” ani coach Chito Victolero sa kanyang Hotshots na nilimitahan si Bolts’ import Tony Bishop sa personal conference-low na 10 points mula sa 5-for-19 field shooting.
- Latest