Pinay booters target ang World Cup berth
MANILA, Philippines — Pipilitin ng Philippine national team na muling makapagsulat ng kasaysayan sa women’s football.
Makikipagtuos ang mga Pinay booters sa Chinese-Taipei ngayong alas-10 ng gabi (Manila time) sa quarterfinal round ng AFC Women’s Asian Cup sa Shiv Chhatrapati Sports Complex sa Pune, India.
Ang panalo ng Nationals ang awtomatikong magbibigay sa kanila ng tiket para sa kauna-unahang paglalaro sa 2023 FIFA Women’s World Cup.
Pamamahalaan ng Australia, awtomatiko nang seeded sa 2023 World Cup bilang co-host, at New Zealand ang 2023 World Cup sa Hulyo 20 hanggang Agosto 20.
Sakaling malasin ang mga Pinay laban sa mga Taiwanese ay mahuhulog sila sa repechage para sa ikalawang tsansang makapasok sa 2023 World Cup.
Kung aabante ang Australia sa semifinals ay maglalaban ang apat na natalong quarterfinalists sa isang knockout match para pag-agawan ang huling dalawang World Cup spots.
Posibleng makasagupa ng national team sa knockout ang alinman sa Australia at Korea.
Kung hindi makakapasok ang mga Aussies sa semis ay magbabakbakan ang tatlong nabigong quarterfinalists kung saan ang best team ang makakasikwat ng World Cup seat.
- Latest