Didal sasabak na sa aksyon
TOKYO — Tangan ni Pinay skater Margielyn Didal ang pagiging gold medalist sa inaugural skateboard competitions sa Asian Games at Southeast Asian Games.
At may tsansa siyang maibigay sa Pilipinas ang kauna-unahang Olympic gold medal.
Sasabak ngayong umaga ang 21-anyos na Cebuana skateboard performer sa women’s street event sa Ariake Sports Park kung saan niya makakatapat ang mga pinakamahuhusay na atleta sa buong mundo.
Si Didal ang nagpasikat sa skateboarding sa Pilipinas matapos angkinin ang gold medal noong 2018 Asian Games sa Palembang, Indonesia kasunod ang pagrereyna noong 2019 Philippine SEA Games.
Nag-obserba si Didal sa venue at pinanood ang mga male skateboarders sa kanilang laban.
Nakatakda ang women’s preliminaries sa alas-8:30 ng umaga (alas-7:30 ng umaga sa Manila) kasunod ang finals sa ala-1:30 ng hapon.
Ito ang magiging debut ng skateborading sa Olympics.
“Kung baga sa basketball, dati half court lang ang inilalaro mo, ngayon full court,” ani Skateboard Pilipinas (SP) president Carl Sambrano. “The duration is the same. It’s still 45 seconds but in a bigger play.”
Ang Tokyo skateboarding courses ay ibinase sa mga disenyo ng ilang world championships at qualifying events.
- Latest
