Isang coach pauuwiin ng POC, nag-positive sa COVID-19

MANILA, Philippines — Nagdesisyon ang Philippine Olympic Committee (POC) na pauwiin ang isang miyembro ng Philippine delegation matapos ang kabi-kabilang positive at negative results ng swab test nito kahapon sa Tokyo Olympics.

Tinukoy ni POC president Bambol Tolentino na isang head coach ng isang team ang nakikitaan ng sintomas ng coronavirus disease (COVID-19) gaya ng lagnat.

Sa regualr na swab test sa Athletes Village, unang lumabas na positive ang resulta ng naturang coach ngunit nag-negatibo ito sa confirmatory test.

Sa ikatlong swab test, lumabas na naman ang isang false positive result. Sumasailalim uli sa confirmatory teast ang naturang coach.

Kaya naman nagpasya na ang POC na pauuwiin na lamang sa Pilipinas ang coach para masiguro ang kaligtasan ng lahat partikular na ng mga atletang sasabak.

“While waiting for another confirmatory test, I have ordered our chef de mission Mariano Araneta to separate him from our team. If the next result is negative, we are sending him home. If he again tests positive, he will be brought to a quarantine hospital,” ani Tolentino.

Bago makapasok sa Narita International Airport sa Japan, dalawang negative RT-PCR tests na ang pinagdaanan ng coach.

Posibleng nakuha ng coach ang virus sa eroplano o sa airport.

Nakahiwalay na ang naturang coach sa Philippine delegation habang naghihintay ng confirmatory test at ng flight schedule nito pabalik sa Pilipinas.