Mann inakay ang Clippers sa West Finals

LOS ANGELES — Humataw si Terance Mann ng career-high 39 points para tulungan ang Clippers na sibakin ang Utah Jazz, 131-119, sa Game Six ng kanilang semifinals series at umabante sa conference finals sa unang pagkakataon sa 51-year franchise history.

Tinapos ng Clippers ang kanilang semis duel ng Jazz sa 4-2 para labanan ang Phoenix Suns sa Western Conference Finals.

Nakatakda ang Game One sa Phoenix bukas.

Nagdagdag si Paul George ng 28 points kasunod ang 27 markers ni Reggie Jackson para sa ikalawang sunod na panalo ng Los Angeles sa Utah bagama’t hindi naglaro si All-Star forward Kawhi Leonard na may sprained right knee.

Bumangon ang Clippers mula sa 25-point deficit sa third quarter para agawin ang 107-106 abante sa huling walong minuto ng fourth period na hindi na nila binitawan.

Pinamunuan ni Donovan Mitchell ang Jazz sa kanyang 39 points at may tig-21 markers sina Fil-Am at NBA Sixth Man of the Year Jordan Clarkson at Royce O’Neale.

Sa Atlanta, nagsalpak si Seth Curry ng anim na 3-pointers at tumapos na may 24 points para tulungan ang Philadelphia 76ers sa 104-99 pagdaig sa Hawks sa Game Six at makahirit ng sudden death sa kanilang Eastern Conference semis wars.

Dadalhin ang Game Seven sa Philadelphia bukas.

Humakot si Joel Embiid ng 22 points at 13 rebounds at nagsalpak si Tobias Harris ng apat na free throws sa huling 13 segundo para itabla ang 76ers sa 3-3 sa kanilang serye ng Hawks.