Bucks humirit ng rubber match sa Nets

MILWAUKEE — Muling nagtambal sina Khris Middleton at Giannis Antetokounmpo para tulungan ang Bucks sa 104-89 paggupo sa Brooklyn Nets sa Game Six ng kanilang Eastern Conference semifinals series.

Umiskor si Middleton ng 38 points at may 30 mar­kers si Antetokounmpo para itabla ang Bucks sa 3-3 sa kanilang best-of-seven semis duel ng Nets.

Idaraos ang Game Seven sa Brooklyn bukas kung saan ang mananaig ang lalaban sa mananalo sa semis wars ng Atlanta Hawks at Philadelphia 76ers para sa conference finals.

Nagdagdag si Middleton ng 10 rebounds, 5 assists at 5 steals para sa Milwaukee na nagmula sa 108-114- pagkatalo sa Game Five tampok ang triple-double na 49 points, 17 rebounds at 10 assists ni Kevin Durant.

Tinunaw ng Nets ang 14-point lead ng Bucks sa third period para makalapit sa 77-82 mula sa three-pointer ni Joe Harris sa 8:41 minuto ng fourth period.

Naglunsad naman sina Middleton at Antetokounmpo ng 14-0 ratsada para sa paglayo ng Milwaukee at tiyakin ang kanilang panalo.

Tumapos si Durant na may 32 points at 11 rebounds sa panig ng Brooklyn at nag-ambag si James Harden, nagmula sa hamstring injury, ng 16 markers.