Gilas asam ang ika-5 dikit
Laban sa Indonesia
MANILA, Philippines — Pupuntiryahin ng Gilas Pilipinas ang kanilang-pang-limang sunod na panalo sa pagsagupa sa Indonesia sa third at final window ng 2021 FIBA Asia Cup Qualifiers sa Angeles University Foundation Gym sa Clark, Pampanga.
Bitbit ang 4-0 record, lalabanan ng Nationals ang mga Indonesians (1-2) ngayong alas-6 ng gabi matapos ang dramatikong 81-78 paglusot sa South Korea (2-1) tampok ang buzzer-beating three-point shot ni point guard SJ Belangel noong Miyerkules.
“I think we were all extremely proud to be able to bring something surprising,” ani head coach Tab Baldwin. “But to be able to bring them something that is going to make Filipinos happy, it’s a great moment for Filipino basketball.”
Ang nasabing panalo ang pormal na nagbigay sa Pilipinas ng tiket para sa FIBA Asia Cup Championships na nakatakda sa Agosto sa Indonesia.
Bilang host country ay may tiket na ang Indonesia sa FIBA Asia Cup Championships kasama ang Lebanon at Bahrain (Group D), Iran at Syria (Group E) at Jordan at Kazakhstan (Group F).
Nag-aagawan naman sa dalawang FIBA Asia Cup berth sa Group C ang Australia, New Zealand, Guam at Hong Kong.
Samantala, ang host Serbia ang kaagad makakasagupa ng Gilas Pilipinas para sa kanilang kampanya sa Group A ng FIBA Olympic Qualifying Tournament sa Belgrade.
Nakatakda ang duwelo ng Nationals at Serbians, maglalaro nang wala si 2020-2021 NBA Most Valuable Player Nikola Jokic ng Denver Nuggets, sa Hulyo 1 (Manila time).
Ipaparada ng Serbia sina NBA players Bogdan Bogdanovic (Atlanta Hawks), 7-foot-4 Boban Marjanovic (Dallas Mavericks) at Aleksej Pokusevski (Oklahoma City Thunder).
Kinabukasan ay lalabanan ng Gilas Pilipinas ang Dominican Republic
Ang maghahari sa Belgrade OQT ang sasama sa host Japan, reigning Olympic gold medalist United States, 2019 World Cup champion Spain, Argentina, France, Australia, Nigeria, Iran at ang mga mananalo sa OQTs sa Kaunas, Lithuania; Victoria, Canada at Split, Croatia ang kukumpleto sa 12-team field sa Tokyo Olympics.
- Latest
