UST humugot na naman

MANILA, Philippines — Tuloy ang rebuilding process ng University of Santo Tomas (UST) matapos muling humugot ng bagong player para sa UAAP men’s basketball tournament.

Sa pagkakataong ito, nakuha ng Growling Tigers ang commitment ni Filipino-Australian guard Royce Mantua ng Far Eastern University-Diliman.

Nagpasya si Mantua na pumasok sa España-based squad dahil naniniwala ito sa programa ng unibersidad hindi lamang sa usaping sports maging sa academics.

Nagtala si Mantua ng average na 2.89 puntos para sa Baby Tamaraws noong UAAP Season 82.

Sa kabila ng pandemya, aktibo pa rin sa paglalaro si Mantua sa Australia.

Naglaro ito para sa City of Blacktown Storm sa Basketball New South Wales Youth League Tournament at sa Western Sydney Basketball Association.

Nauna nang nakuha ng Growling Tigers si Jordi Gomez de Liaño na produkto ng University of the Philippines-Integrated School.

Nasa rebuilding process ang UST matapos maglayasan ang ilang key players nito dahil sa kontrobersiyang kinasangkutan ng tropa noong nakaraang taon sa Sorsogon bubble.