Abando, Nonoy target isama sa Gilas pool
MANILA, Philippines — Dalawa pang matitikas na collegiate stars ang puntirya ni Samahang Basketbol ng Pilipinas (SBP) program director Tab Baldwin na maisama sa Gilas Pilipinas pool.
Ito ay sina Rhenz Abando ng Colegio de San Juan de Letran at Mark Nonoy ng De La Salle University na parehong galing sa University of Santo Tomas.
Maliban kina Abando at Nonoy, plano rin ni Baldwin na ibalik sa pool si University of the Philippines standout Juan Gomez de Liaño.
Maganda ang ipinamalas nina Abando at Nonoy sa UAAP Season 82.
Bahagi ito ng Growling Tigers na nakapasok sa finals.
Sa naturang season, nagtala si Abando ng averages na 11.71 points, 5.29 rebounds at 1.29 blocks kada laro habang mayroon namang 11.3 points, 4.0 rebounds at 2.9 assists si Nonoy para tanghaling Rookie of the Year.
“We are looking at players like Mark Nonoy and Rhenz Abando as well. Expanding and bringing in more talent. As long as players are available, when we have to expand the pool, that’s what we are going to do,” ani Baldwin sa Zoom In.
Sa kabilang banda, pinatunayan ni Gomez de Liaño na karapat-dapat ito sa pool nang umiskor ito ng 12.0 points, 3.0 rebounds at 3.0 assists sa tatlong laro nito sa FIBA Asia Cup Qualifiers.
- Latest