Portland pinatibay ang kapit sa playoffs
PORTLAND, Ore., Philippines — Humataw si Damian Lillard ng 34 points para igiya ang Trail Blazers sa 140-129 pagpapasabog sa talsik nang Houston Rockets.
Hindi natinag ang Portland (40-20) sa No. 6 spot sa Western Conference para palakasin ang kanilang tsansa sa playoffs kasabay ng pag-iwan sa nagdedepensang Los Angeles Lakers (38-30) sa No. 7.
Iniiwasan ng Trail Blazers at Lakers na maglaro sa play-in tournament kung saan pag-aagawan ng No. 7 at No. 8 teams ang 7th seeding sa playoffs at ang matatalo ang haharap sa mananaig sa pagitan ng No. 9 at No. 10 squads at pag-agawan ang 8th seeding.
Makukuha ng Portland ang playoff spot sa West kapag nawalis ang huli nilang tatlong laban sa mga playoff-bound na Utah Jazz (50-19), Phoenix Suns (48-20) at Denver Nuggets (44-24).
Ang isang kabiguan ng Trail Blazers at ang panalo ng Lakers sa huli nilang apat na laban ang magbibigay sa tropa ni LeBron James ng No. 6 playoff spot.
Sa San Francisco, sinikwat ng Golden State Warriors (36-33) ang play-in ticket sa West nang ilusot ang 119-116 tagumpay.
Sa Memphis, sinakmal ng Grizzlies (35-33) ang New Orleans Pelicans (31-38) sa 115-110 panalo papasok sa play-in tournament sa West.
Sa Atlanta, binasag ni Russell Westbrook ang 47-year-old NBA record ni Oscar Robertson para sa triple-doubles subalit naimintis ang potensyal na game-winning triple sa 124-125 pagkatalo ng Washington Wizards (32-37) sa Hawks (38-31).
Itinala ni Westbrook ang kanyang ika-182 triple-double matapos hablutin ang rebound sa 8:29 minuto ng fourth quarter.
- Latest