76ers nangunguna pa rin sa East

HOUSTON, Philippines — Kumamada si Joel Embiid ng 34 points sa loob ng 25 minuto para banderahan ang Philadelphia 76ers sa 135-115 pagpapabagsak sa  wala nang pag-asa sa playoffs na Rockets.

Ito ang ikaanim na sunod na ratsada ng 76ers (45-21) para patuloy na pangunahan ang Eastern Conference at ipalasap sa Rockets (16-50) ang pangatlong dikit na kabiguan.

Sa pagbibida ni Embiid ay kinuha ng Philadelphia ang 97-78 abante sa pagsisimula ng third period patungo sa 123-99 pagbaon sa Houston sa huling pitong minuto ng fourth quarter.

Pinamunuan ni Kelly Olynyk ang Rockets sa kanyang 27 points at nagdagdag si rookie KJ Martin ng career-high 23 markers.

Sa Salt Lake City, kumamada si Fil-American guard Jordan Clarkson ng 30 points at may 24 markers si Bojan Bogdanovic sa 126-94 pagbugbog ng Utah Jazz (48-18) sa San Antonio Spurs (31-34).

Muling napasakamay ng Jazz (48-18) ang No. 1 spot sa NBA at sa Western Conference standings.

Sa Milwaukee, nalampasan ng Bucks (42-24) ang pagkaka-foul out ni Giannis Antetokounmpo sa huling 1:24 minuto ng laro sa 135-134 paglusot sa Washington Wizards (30-36).

Sa Atlanta, umangat ang Hawks (37-30) sa No. 5 sa East standing matapos iposte ang 135-103 tagumpay sa Phoenix Suns (47-19).