Bakbakang Casimero-Rigondeaux sa August 14
MANILA, Philippines — Magbabalik-aksiyon si World Boxing Organization (WBO) bantamweight champion John Riel Casimero sa Agosto 14 sa isang unification bout laban kay World Boxing Association (WBA) regular bantamweight titlist Guillermo Rigondeaux.
Matagal-tagal na ring nasa radar ni Casimero ang pangalan ni Rigondeaux kaya’t excited na ang Pinoy pug na makaharap ito. Alam ni Casimero malalim na karanasan at makulay ang boxing career si Rigondeaux.
Ngunit mawawalan ito ng ningning sa oras na ilapat nito ang “knockout punch” na magpapatulog sa Puerto Rican pug.
Matatandaang si Rigondeaux ang tumalo kay dating world champion Nonito “The Filipino Flash” Donaire noong 2013 via unanimous decision.
“Alam naman natin na tinalo niya si Donaire. Two-time Olympian din ‘yan. ‘Di natin minamaliit. Pero ‘pag matamaan ‘yan sa atin isang beses lang tulog ‘yan,” ani Casimero.
Armado si Rigondeaux ng rekord na 20-1 tampok ang 13 knockouts at nagkampeon din ito sa Olympics ng dalawang beses — noong 2000 sa Sydney, Australia at 2004 sa Athens, Greece.
Ngunit hindi nasisindak si Casimero na may sariling matikas na 30-4 rekord ito kasama ang 21 knockouts.
Noong Setyembre 2020, naitarak ni Casimero ang third round knockout win kay Duke Micah ng Ghana.
- Latest