SBP umaksiyon din sa Siquijor

MANILA, Philippines — Gumugulong na ang sariling imbestigasyon ng Samahang Basketbol ng Pilipinas (SBP) upang busisiin ang isyu sa loob ng VisMin Super Cup bubble na kinasangkutan ng Siquijor at Lapu-Lapu teams.

Ayon kay SBP president Al Panlio, inatasan nito sina SBP executive director Sonny Barrios at director of operations Butch Antonio para malaman ang lahat ng detalye.

Sa oras na matapos ang imbestigasyon, inaasahang maglalapat ng sariling parusa ang SBP base sa magi-ging resulta at rekomendasyon ng kumite.

Hindi natuwa ang SBP sa umano’y “pambababoy” ng Siquijor at Lapu-Lapu sa laro nito noong Miyerkules na umani ng kaliwa’t kanang batikos sa buong basketball community.

“Hindi ito acceptable in any sport,” ani Panlilio sa programang Power and Play.

Malaki ang pananagutan ng mga players, coaches at officials na nasa loob ng VisMin Super Cup dahil sa tiwalang ibinigay sa kanila para makapagdaos ng isang torneo.

Iginiit ni Panlilio na hindi dapat sirain ninuman ang tiwalang ibinigay sa kanila. Nararapat na maging magandang ehemplo ang lahat lalo na sa mga kabataang nakakapanood ng mga laro nito.

“There’s a great responsibility of being given that chance and they have to show the youth how the game should be played. I was aghast with that incident. It’s completely disrespecting the game that we love,” ani Panlilio.

Dahil sa pangyayari, nagbabala si Panlilio na posibleng maparusahan ng SBP ang mga players maging ang liga mismo.

Hihintayin lamang nito ang magiging resulta ng imbestigasyon.

“I think from the federation’s point-of-view, we can sanction them maybe by suspending the players and the league. Definitely, we need to sanction them. I just want to make sure that we make the right application of sanctions,” dagdag ni Panlilio.

Nakarating naman kay Games and Amusements Board chairman Baham Mitra na tila walang bahid ng pagsisisi ang kampo ng Siquijor sa mga nangyari.

Ilang kinatawan ng GAB ang nakipag-pulong sa Lapu-Lapu at Siquijor teams. Malungkot ang Lapu-Lapu sa mga pangyayari ngunit ikinadismaya ni Mitra ang umano’y kawalan ng pagsisi sa grupo ng Siquijor.