76ers pinigilan ang Clippers

PHILADELPHIA - Humakot si center Joel Embiid ng 36 points at 14 rebounds sa 106-103 panalo ng 76ers na tumapos sa seven-game winning streak ng Los Angeles Clippers.

Nagdagdag si Furkan Korkmaz ng 18 points at nagtala si Ben Simmons ng 12 markers at 9 boards para sa ikaapat na sunod na pananalasa ng Eastern Conference-leading Philadelphia (39-17).

Ang three-point play ni Korkmaz ang naglayo sa 76ers sa 104-98 sa huling 47.7 segundo ng fourth quarter, habang ang triple ni Reggie Jackson ang nagdikit sa Clippers (39-19) sa 103-104 sa nalalabing 20.5 segundo.

Isinalpak ni Danny Green ang dalawang free throws para sa Philadelphia na sinundan ng mintis na tres ni Marcus Morris sa panig ng Los Angeles.

Sa Salt Lake City, ginamit ng Utah Jazz (42-14) ang kanilang mahigpit na depensa para kunin ang 119-111 panalo sa Indiana Pacers (26-29).

Sa New York, nagsumite si Kevin Durant ng 25 points at 11 assists at may 26 markers si Joe Harris para sa 130-115 pagdaig ng Brooklyn Nets (38-18) sa Charlotte Hornets (27-28).

Sa Houston, umiskor si Nikola Jokic ng 29 points at nag-ambag si Michael Porter Jr. ng 21 markers para ihatid ang Denver Nuggets (36-20) sa 128-99 pagsunog sa Rockets (14-42).