National karatekas sasabak sa training sa Istanbul

MANILA, Philippines — Sasabak ang national karatedo team sa isang two-month training camp sa Istanbul, Turkey bilang preparasyon sa Olympic Games qualifying tournament sa Hunyo.

Bibiyahe sina national karatekas Jamie Lim, Sharif Afif, Alwyn Batican at Ivan Agustin patungo sa Istanbul sa susunod na buwan kung saan nila makakasama sina US-based Joane Orbon at Japan-based Junna Tsukii.

Sina Lim, 2019 Southeast Asian Games gold medalist, Afif, Batican, Agustin ay kasalukuyang nasa loob ng ‘bubble’ trai­ning sa Inspire Sports Academy sa Calamba, Laguna.

Matapos ang kanilang two-month training camp sa Istanbul ay babalik ang mga national karatekas sa bansa bago muling umalis sa H­unyo 1 patu­ngong Paris, France para sumabak sa pinakahuling qualifying tournament ng 2021 Olympics sa Tokyo, Japan.

Nakatakda ang quadrennial event sa Hulyo 23 hanggang Agosto 8.

Ang 29-anyos na si Tsukii, ang 2019 SEA Games gold medal winner, ang nag-iisang entry ng national karatedo team sa Premier League tournament sa Marso 11 sa Istanbul.

Hangad ni Tsukii na makapasok sa top four sa Olympic ranking system para makakuha ng Olympic slot.

Nakapuwesto si Tsukii sa No. 10 sa World Karate Federation rankings katabla si Bakhriniso Babaeva ng Uzbekistan sa magkapareho nilang 3,712.50 points.

Ang nasa top four ay sina Serap Ozcelik Arapoglu ng Turkey (11,542.50 points), Miho Miyahara ng Japan (6,300), Bettina Plank ng Austria (5,377.50) at Sara Bahmanyar ng Iran (5,272.50).