MANILA, Philippines — Hindi lalahok si Gilas Pilipinas pool member Justine Baltazar sa PBA Annual Rookie Draft.
Nagdesisyon ang 6-foot-9 cager na isentro muna ang atensiyon nito sa Gilas Pilipinas gayundin sa nalalabing playing year nito sa UAAP kasama ang De La Salle University.
“Hindi muna (rookie draft) dahil gusto ko muna mag-focus sa Gilas (habang wala pa ang UAAP),” ani Baltazar na isa sa itinuturing na may malaking potensiyal maging top pick sakaling tumuloy ito sa draft.
Impresibo ang mga numero ni Baltazar sa huling season ng UAAP.
Mayroon itong averages na 15.14 points, 11.8 rebounds at 1.07 block kada laro.
Nagtala naman ito ng averages na 7.0 points at 8.5 rebounds sa second window ng FIBA Asia Cup Qualifiers noong Nobyembre sa Manama, Bahrain.
Magandang balita ang desisyon ni Baltazar para sa Green Archers.
Subalit hindi lahat maganda dahil nagpasya naman si Aljun Melecio na tuluyan nang lisanin ang kampo ng La Salle para sumalang sa rookie draft.
Nagsumite ng aplikasyon si Melecio sa huling araw ng deadline kahapon.
Nagpasalamat ito sa buong La Sallian community sa ilang taong suporta nito sa kanya.