Pacquiao-Mcgregor fight tagilid na?

Ryan Garcia umeeksena

MANILA, Philippines — Nanganganib na hindi na matuloy pa ang paghaharap nina Ultimate Fighting Championship (UFC) superstar Conor McGregor at eight-division world champion Manny Pacquiao.

Mismong si McGregor na ang nagdududa kung matutuloy pa ang laban matapos magtamo ng second-round knockout loss kay Dustin Poirier noong Linggo sa UFC 257 sa Abu Dhabi.

“I wanted to focus on my MMA career but I’m also open (in boxing). Let’s just see what happens. I don’t know what will happen. That Manny fight was happening. It was as good as done. (Now) I don’t know,” ani McGregor.

Bago pa man ang laban nito kay Poirier, inamin ni McGregor na gumugulong na ang negosasyon para sa Pacquiao fight na planong ganapin sa Middle East.

Ngunit posibleng maglaho na ito ng tuluyan dahil sa hindi magandang resulta ng laban ni McGregor kay Poirier.

“It’s (Pacquiao fight) almost a certainty. I’m hearing there’s a contract and all coming. It’s that close,” ani McGregor.

Alam ni McGregor na may pagkukulang ito na nagresulta sa knockout loss kay Poirier.

Mas preparado at may solidong game plan sa laban si Poirier.

“(It’s) the highest highs and the lowest lows in this game. I don’t know where I’m at, at the minute, to be honest. I’ll regroup. I’ll pick myself up, get up off the floor and go again. I’ll keep my head high,” ani McGregor.

Dahil dito, mas lalong umugong ang pangalan ni Ryan Garcia sa posibleng makaharap na lamang ni Pacquiao.

Sa katunayan, nag-post pa si Garcia sa kanyang social media account ng poster ng “dream fight” nito laban sa Pinoy boxing legend.

“A dream turned reality. It’s an honor to share the ring with Manny Pacquiao. I will always respect what you did in and out the ring. Here’s to the best man winning,” ani Garcia sa kanyang post.

Wala pa namang kumpirmasyon ang Pacquiao camp. Hindi pa naglalabas ng statement ang grupo ni Pacquiao kung matutuloy ang McGregor fight o tuluyan na lamang hahanap ng bagong kalaban.

Una nang inihayag ng kampo ni Pacquiao na pursigido ang Pinoy boxer na matuloy ang McGregor fight dahil target gamitin ang bahagi ng kikitain nito sa pagtulong sa mga Pilipinong naapektuhan ng coronavirus disease (COVID-19) pandemic.