Harden pasikat agad sa Nets
NEW YORK, Philippines — Bagama’t hindi nakapag-ensayo kasama ang bagong tropang Brooklyn Nets ay hinirang pa rin si James Harden bilang unang player sa franchise history na nagposte ng triple-double sa kanyang debut game.
Kumolekta si Harden ng 32 points, 14 assists at 12 rebounds at humataw si Kevin Durant ng season-high 42 points para sa 122-115 panalo ng Nets kontra sa Orlando Magic.
“Early on I felt like we all were overpassing, trying to make everybody comfortable,” ani Durant, “And then he just got into his mode of being aggressive to score and that opened up the whole game for others.”
Sina Harden at Durant ay dating magkakampi sa Oklahoma City Thunder kasama si Russell Westbrook.
Ito ang unang laro ni Harden para sa Brooklyn (8-6) matapos ang blockbuster four-team trade na pinamunuan ng Houston Rockets.
Kumolekta si center Nikola Vucevic ng 34 points, 10 rebounds at 7 assists para sa pang-limang sunod na kabiguan ng Orlando (6-7).
Sa San Antonio, umiskor si DeMar DeRozan ng 24 points at humakot si Dejounte Murray ng 18 points at 10 rebounds para sa 103-91 tagumpay ng Spurs (7-6) kontra sa eight-man Rockets (4-7).
Pinamunuan ni center Christian Wood ang Houston sa kanyang 24 points at 17 rebounds.
Sa Memphis, kumamada si Ja Morant ng 17 points sa kanyang pagbabalik sa lineup ng Grizzlies (6-6) matapos mawala ng walong laro dahil sa ankle injury para ilusot ang 106-104 panalo sa Philadelphia 76ers (9-5).
Naglista si Shake Milton ng 28 markers para sa 76ers habang may 21 points si Tobias Harris at kumolekta si Ben Simmons ng 11 points, season-high 16 boards at 9 assists.
Sa Miami, tumapos si Jerami Grant na may 24 points kasunod ang 22 markers ni Derrick Rose para sa 120-100 pananaig ng Detroit Pistons (3-9) sa Heat (4-7).
- Latest
