PBA tutulong sa 3rd window
Sakaling mapili ng FIBA
MANILA, Philippines — Handa ang pamunuan ng Philippine Basketball Association (PBA) na ilatag ang mga kamay nito para tulungan ang Samahang Basketbol ng Pilipinas (SBP) sa pagpapatakbo ng isang bubble setup.
Sakaling makuha ng Pilipinas ang hosting ng third window ng FIBA Asia Cup Qualifiers na idaraos sa Pebrero 18 hanggang 21, ibabahagi ng PBA ang kaalaman nito sa SBP.
Sanay na sanay na ang PBA sa bubble.
Mahigit dalawang buwan na nitong pinapatakbo ang PBA Season 45 Philippine Cup sa isang bubble setup sa Clark, Pampanga.
Kabisado ng PBA ang pasikut-sikot sa pagpapatupad ng health protocols sa isang bubble — mula sa swab testing, accommodation hanggang pagsasagawa ng actual tournament.
Isasama na lamang sa konsepto ng PBA bubble ang mga natutunan ng SBP sa bubble setup na ginamit sa second window ng qualifiers sa Manama, Bahrain na nakabase sa standards na inilatag ng FIBA.
Kaya naman may ideya na ang SBP sa oras na muli itong maglatag ng panibagong offer sa hosting ng third window.
- Latest