3X3 Manila players sali sa PBA Rookie Draft
Babu na sa Chooks
MANILA, Philippines — Tuluyan nang nalagas ang 3x3 Manila nang magpasya ang lahat ng miyembro nito na magsumite ng aplikasyon para sa PBA Annual Rookie Draft.
Lilisanin na nina Joshua Munzon, Alvin Pasaol, Troy Rike at Santi Santillan ang 3x3 Manila para ituon ang kanilang atensiyon sa rookie draft.
Nagdesisyon ang apat na hindi na pumirma pa ng contract renewal sa Chooks-to-Go Pilipinas 3x3 na siyang humahawak sa tropa.
Mapapaso na sa Disyembre ang kontrata nina Munzon, Pasaol, Rike at Santillan sa 3x3 Manila.
Malaki ang pasasalamat ng apat sa pamunuan ng Pilipinas 3x3 na nagbigay sa kanila ng oportunidad na katawanin ang bansa sa mga FIBA-sanctioned tournaments.
Galing ang 3x3 Manila sa kampanya nito sa FIBA 3x3 World Tour - Doha Masters sa Doha, Qatar kamakailan. Subalit hindi umabante sa quarterfinals ang koponan matapos lumasap ng dalawang sunod na kabiguan sa group stage — laban sa Liman ng Serbia (15-22) at Lusail ng Qatar (14-19).
Hindi naman hinadlangan ng pamunuan ng Pilipinas 3x3 ang desisyon ng apat dahil suportado ng grupo ang pangarap nilang makapasok sa PBA.
“We at Chooks-to-Go won’t hinder you from achieving your dreams. Good luck on your next journey! All of you will always be a Manok ng Bayan!” ayon sa statement ng liga.
- Latest
