De Los Santos kampeon sa Pune Open India

MANILA, Philippines — Hindi maawat si world No. 1 Orencio James De Los Santos nang makasikwat na naman ito ng gintong medalya sa 2020 Pune Open India Karate E-Tournament.

Matikas na pinataob ni De Los Santos si Alves Murillo ng Brazil sa iskor na 3-0 sa championship round ng men’s seniors individual kata event para hablutin ang gintong medalya.

Ito ang ika-18 ginto ni De Los Santos sa online tournament para higit na patatagin ang kanyang kapit sa unang puwesto sa world ranking.

Nakapasok sa finals si De Los Santos makaraang patalsikin nito sina Alfredo Bustamante sa quarterfinals (3-0) at Domont Matias Moreno ng Switzerland sa semifinals (3-0).

Doble pa ang kasiyahan ni De Los Santos dahil muling nakahirit ng medalya ang kanyang mga inaalagaang bagitong karatekas.

Parehong naka-tanso sina Christina Karen Colonia at Fatima Hamsain sa female individual under-15 kata event.

“It made me a lot happier when two of my students from MKKPI, Fatima and Karen, won bronze medals in the U15 female eKata division,” wika ni De Los Santos sa kanyang post sa social media.

Hindi pa tapos si De Los Santos dahil nakalinya pa ang ilang international online tournaments na lalahukan nito.

Target ni De Los Santos na mapanatili ang No. 1 spot sa world ranking hanggang sa matapos ang 2020 season.