De Los Santos bumanat na naman ng ginto
MANILA, Philippines — Hindi maawat si world No. 2 Orencio James De Los Santos matapos muling makasungkit ng gintong medalya sa men’s seniors individual kata sa 2020 Venice Cup E-Tournament.
Nairehistro ni De Los Santos ang impresibong 25.2-23.7 panalo laban kay Nejc Sternisa ng Slovenia sa finals upang matamis na angkinin ang gintong medalya.
“I faced Slovenia in the final round. I ended up snagging the gold medal,” ani De Los Santos sa kanyang post sa social media.
Unang tinalo ni De Los Santos si Taylor Scott ng Canada sa Round-of-16 kasunod si Kevin Petry ng Luxembourg sa quarterfinals at Domont Matias Moreno ng Switzerland sa semifinals.
Ito ang ika-12 gintong medalya ni De Los Santos sa online tournament upang mas lalong lumakas ang tsansa nitong masikwat ang No. 1 spot sa world ranking.
Kasalukuyang hawak ni Eduardo Garcia ng Portugal ang unang puwesto sa ranking.
“I’m not far from No. 1 spot. Just a little more. We’re almost there. The journey continues,” dagdag ni De Los Santos.
Sariwa pa si De Los Santos sa matamis na kampeonato sa Tokaido Maribor Open E-Tournament gayundin sa double victory nito sa Hatamoto Kai Mitad Del Mundo E-Tournament at SportData E-Tournament World Series.
Ilang online tournament pa ang lalahukan ni De Los Santos upang makalikom ng puntos para mapataas ang kanyang world ranking.
Optimistiko si De Los Santos na muli itong makasisikwat ng gintong medalya sa kanyang mga susunod na torneong sasalihan.
- Latest
