Casimero gustong maging 4-division champion

MANILA, Philippines — Kung patuloy siyang iiwasan ni Japanese star Naoya Inoue ay hahamunin na lamang ni Filipino world bantamweight champion John Riel Casimero si Mexican super bantamweight king Luis Nery.

Ito ay para makopo niya ang ikaapat na korona sa apat na weight divisions.

“Kung ayaw talaga ni Naoya Inoue na lumaban sa akin, aakyat ako sa weight division ni Luis Nery para maging four-division champion tayo,” wika kahapon ni Casimero mula sa US sa webcast edition ng Philippine Sportswriters Association (PSA).

Nagkampeon ang 30-anyos na si Casimero sa light flyweight at flyweight divisions.

Bitbit ni Nery ang World Boxing Council (WBC) super bantamweight title matapos talunin si Aaron Alameda via unanimous decision noong Linggo.

Matagumpay namang naidepensa ni Casimero (30-4-0, 21 KOs) ang kanyang World Boxing Organization (WBO) bantamweight crown makaraang bugbugin si Ghanian challenger Duke Micah (24-1-0, 19 KOs) via third-round TKO win noong Linggo sa Mohegan Sun Arena sa Uncasville, Connecticut.

Hihintayin ni Casimero ang resulta ng laban ni Inoue (19-0-0, 16 KOs) kay Australian challenger Jason Moloney (21-1-0, 18 KOs) sa Oktubre 31 sa MGM Grand Conference Center sa Las Vegas.

“Kapag ayaw niya talaga, huwag na lang,” sabi ng tubong Ormoc City, Leyte kay Inoue, may suot ng IBF at  WBA bantamweight belts.