Casimero pormado na!
Para sa title defense laban kay Micah
MANILA, Philippines — Pormadong-pormado na si World Boxing Organization (WBO) bantamweight champion John Riel Casimero para sa pagdepensa nito ng titulo laban kay African fighter Duke Micah sa Setyembre 26 sa Mohegan Sun Casino sa Connecticut.
Lutang na lutang na ang bagsik ni Casimero na handang-handa nang pabagsakin ang Ghanian pug.
Mas matangkad ng bahagya si Micah na may taas na 5-foot-7 kumpara kay Casimero na nasa 5-foot-4 lamang.
Ngunit sanay na ang Pinoy champion na humarap sa mas malalaking kalaban.
Magugunitang pinabagsak nito ang 5-foot-9 na si South African champion Zolani Tete noong Disyembre sa Birmingham, England para makuha ang WBO title.
Matikas din ang rekord ni Micah na may malinis na 24-0 baraha tampok ang 19 knockouts kaya’t walang balak mag-relax si Casimero.
“Talagang pinaghandaan ko siya. He’s also a good fighter, may magandang record and a knockout artist,” ani Casimero.
Walang tigil sa ensayo si Casimero para masiguro na preparado ito sa laban.
Bantay-sarado ni veteran training Memo Heredia ang bawat kilos ni Casimero.
Ilang sparring sessions ang pinagdaanan nito kasabay ng matitinding mitts at heavy bag.
Ingat din ang Pinoy pug sa mga kinakain nito para matiyak na nasa tamang timbang sa official weigh-in na idaraos sa Setyembre 25 sa venue.
Tiyak na ibubuhos ni Casimero ang lahat kay Micah matapos maudlot ang laban nito kontra kay World Boxing Association (WBA) at International Boxing Federation (IBF) titlist Naoya Inoue noong Abril.
- Latest