Pacers itinumba ang Lakers

Pacers itinumba ang Lakers

LAKE BUENA VISTA, Florida , Philippines —  Nagpasiklab si T.J. Warren ng 39 points para akayin ang Indiana Pacers sa 116-111 pagtakas sa Los Angeles Lakers sa NBA restart season kahapon dito.

Isang linggo matapos kumamada ng career-high 53 points sa restart opener, kumonekta si Warren ng isang floater para sa 109-108 abante ng Pacers na sinundan niya ng jumper at three-pointer para sa kanilang six-point lead sa Lakers sa huling 10 segundo ng fourth quarter.

Pinaganda ng Pacers ang kanilang record sa 4-1 sa NBA bubble at lumapit sa Philadelphia 76ers para sa fifth seed sa Eastern Conference.

Nagdagdag si Malcolm Brogdon ng 24 points para sa Indiana at may 22 mar­kers si Victor Oladipo.

Tumapos si LeBron James na may 31 points, 8 rebounds at 7 assists sa panig ng Lakers, nauna nang nakuha ang top seed sa Western Conference.

Umiskor naman si Luka Doncic ng 36 points sa kanyang NBA-leading na ika-17 triple-double para sa 136-132 overtime win ng Dallas Mavericks laban sa Milwaukee Bucks.

Nagtala si Doncic ng career-high 19 assists at 14 rebounds para sa Ma­vericks.

Kumolekta si Giannis Antetokounmpo ng 34 points, 13 rebounds at 5 blocks para sa Bucks, naibulsa na ang top seed sa Eastern Conference habang nagposte si Brook Lopez ng season-high 34 points.

Tumipa si Devin Booker ng 35 points at nag-ambag si Jevon Carter ng season-high 20 points sa 119-112 paggupo ng Phoenix Suns kontra sa Miami Heat.

Nagsalpak si Carter ng anim sa walong 3-pointers ng Suns, may 5-0 baraha sa restart season.

Naipasok ni Rodney McGruder ang kanyang triple sa huling 26.5 segundo para iligtas ang Los Angeles Clippers laban sa Portland Trail Blazers, 122-117.

Naglista naman si Jamal Murray ng 23 points sa una niyang laro sa NBA restart para ihatid ang Denver Nuggets sa 134-132 double overtime win kontra sa Utah Jazz.