Nets sumilo ng playoff spot
Celtics nagpalakas sa no. 2 seat
LAKE BUENA VISTA, Florida -- Tumipa si Caris LeVert ng 22 points habang kumolekta si Jarrett Allen ng 17 points, 11 rebounds at 8 assists para pamunuan ang Brooklyn Nets sa 119-106 paggiba sa Sacramento Kings.
Ang panalo ang nagbigay sa Brooklyn ng isang playoff berth.
Sumabak ang Nets sa NBA bubble na wala sina stars Kevin Durant (ruptured Achilles), Kyrie Irving (right shoulder), Spencer Dinwiddie (coronavirus) at DeAndre Jordan (coronavirus).
Nagdagdag si Joe Harris ng 21 points tampok ang 5-of-7 shooting sa three-point range para sa Brooklyn.
Umiskor naman si Jaylen Brown ng 20 points habang may 18 markers si Jayson Tatum para sa 122-100 pagrapido ng Boston Celtics sa nagdedepensang Toronto Raptors.
Nag-ambag si Kemba Walker ng 17 points para sa Celtics, pinalakas ang tsansang makuha ang No. 2 spot sa Eastern Conference.
Binanderahan ni Fred VanVleet ang Toronto sa kanyang 13 points.
Humataw si Jrue Holiday ng 28 points para akayin ang New Orleans Pelicans sa 118-107 pagpapatumba sa Washington Wizards at palakasin ang pag-asa sa isang Western Conference playoff spot.
Kumamada naman si Tobias Harris ng 23 points at 15 rebounds at pumitas si Joel Embiid ng 23 points at 13 rebounds para sa 108-101 pagdaig ng Philadelphia 76ers sa Orlando Magic.
- Latest
