Boxing return wala pa sa plano ni Pacquiao
MANILA, Philippines — Walang balak magbalik-aksyon si eight-division world champion Manny Pacquiao hangga’t dumaranas ang buong sambayanan ng krisis dahil sa coronavirus disease (COVID-19).
Mismong si chief trainer Buboy Fernandez na ang nagkumpirma na hindi muna sasalang ang reigning World Boxing Association (WBA) welterweight champion sa laban.
Nakasentro ang atensiyon ni Manny sa pagtulong sa gobyerno kung paano susugpuin ang COVID-19 na pumalo na sa mahigit 100,000 kaso sa Pilipinas.
Ayaw ni Fernandez na sumabak si Pacquiao sa laban at magkaroon ng engrandeng selebrasyon sa oras na manalo ito habang ang mga kababayang Pilipino nito ay apektado ng krisis.
Dahil sa pandemya, maraming Pilipino ang nawalan ng trabaho habang ilang libo na ang kasalukuyang lumalaban sa sakit na COVID-19 sa iba’t ibang ospital sa bansa.
Masaklap pa na patuloy na nadaragdagan ang bilang ng mga namamatay kabilang na ang mga fronliners gaya ng mga doktor at nurses. Kaya naman mas makabubuti para kay Pacquiao na ituon ang sarili nito sa pagtulong sa mga kababayan nito.
- Latest
