Marcial tututukan mismo ni Pacquiao
MANILA, Philippines — Mismong si eight-division world champion Manny Pacquiao ang gagabay sa boxing career ni three-time Southeast Asian Games champion Eumir Felix Marcial.
Nakabantay si Pacquiao sa lahat ng magiging galaw ni Marcial dahil nais nitong maging matagumpay ang bagitong boxer sa larangang pinasok nito.
Kaakibat ni Marcial ang reigning World Boxing Association (WBA) welterweight champion sa pangarap nitong masungkit ang gintong medalya sa Olympic Games na idaraos sa Tokyo, Japan sa susunod na taon.
Ngunit nangako rin si Pacquiao na tutulungan nito si Marcial na maabot ang tugatog ng tagumpay at maging isang world champion sa boxing balang araw.
Hangad ni Pacquiao na masundan ni Marcial ang kanyang yapak.
Nakikita ni Pacquiao ang kanyang sarili kay Marcial na galing din sa hirap na nangangarap na maging matagumpay na boksingero sa mundo.
“Gusto ko talagang tulungan siya para sumunod sa yapak ko sa tulong ng ating Panginoon,” ani Pacquiao.
Handa si Pacquiao na ibahagi ang lahat ng nalalaman nito kay Marcial para maging ganap na boxing world champion.
Malaki ang tiwala ni Pacquiao sa kakayahan ni Marcial. May abilidad ito at lakas na tunay na katatakutan sa professional boxing.
Kailangan lang ng sipag, determinasyon at tapang na magiging sandata nito sa lahat ng pagsubok na darating sa kanyang buhay.
- Latest