Mcgregor hinamon si Pacquiao?
MANILA, Philippines — Nabuhay ang dugo ng mga boxing fans matapos ‘hamunin’ ni Ultimate Fighting Championship (UFC) champion Conor McGregor si reigning World Boxing Association (WBA) welterweight champion Manny Pacquiao.
Nagsimula ang lahat nang batiin ng Pinoy champion si McGregor sa kanyang ika-32 kaarawan noong Hulyo 14.
Nag-post si Pacquiao ng “Happy Birthday @TheNotoriousMMA (ang official account ni McGregor sa social media)” kasama ang emoticon na kamao.
Ngunit nagulantang ang lahat nang sagutin ito ni McGregor ng “Thank you Emmanuel, 170” noong Hulyo 16 na posibleng nagsusuhestiyon na magharap sa 170 pounds na weight class ang dalawang fighters.
Hindi malinaw kung ang posibleng suhestiyon ni McGregor ay laban sa boxing o mixed martial arts (MMA).
Hindi na bago si McGregor sa mundo ng boxing dahil nakaharap na nito si undefeated American pug Floyd Mayweather Jr. noong Agosto 26, 2017 sa T-Mobile Arena sa Paradise, Nevada.
Nagharap sina McGregor at Mayweather sa catch weight na super welterweight o 154 pounds.
Naitala ni Mayweather ang 10th-round technical knockout win sa naturang mega bout na umani ng limpak-limpak na kita mula sa gate receipts at pay-per-view buys.
Nauna nang napaulat ang posibilidad na paghaharap nina Pacquiao at McGregor.
Subalit malabo pa itong mangyari dahil sa kasalukuyang dinaranas ng buong mundo na dulot ng coronavirus disease (COVID-19) pandemic.
Nag-anunsiyo na rin ng retirement si McGregor noong Hunyo.
Hindi naman na bago sa lahat ang posibilidad ng pagbabalik-aksyon nito.
Sa kabilang banda, nakaabang lang ang Team Pacquiao sa mga susunod na pangyayari kung kailan babalik sa normal ang lahat para sa kanyang title defense. Tuloy lang sa pagpapakundisyon si Pacquiao upang mapanatiling nasa porma ang pangangatawan nito sakaling maikasa na ang kanyang susunod na laban.
- Latest