La Salle desididong mabawi ang UAAP crown

2 Fil-ams hinugot

MANILA, Philippines —Tuloy ang pagpapa­lakas ng De La Salle University nang masungkit nito ang dalawang matikas na Filipino-American cagers para sa UAAP men’s basketball wars.

Mas lalong babagsik ang Green Archers sa pagpasok ng Phillips bro­thers na sina Benjamin at Michael.

Parehong may taas na 6-foot-8 ang magkapatid kaya’t malaking tulong ito sa tangka ng Taft-based squad na maibalik sa kanilang teritoryo ang korona.

Limang fresh playing eligibility ang nakaabang kay Michael dahil freshman ang 18-anyos Fil-Am player.

Naglaro ito para sa Creekside High School kung saan nagtala ito ng averages na 12.9 points, 11.2 rebounds, 1.7 assists, 1.6 steals at 1.4 blocks sa kanyang huling taon sa koponan.

Sa kabilang banda, nasilayan na sa aksyon ang 21-anyos na si Benjamin sa Fairfield High School bago magdesisyon na mag-enroll sa La Salle noong 2019 para sumailalim sa residency.

Malaki ang maitutulong ng dalawa para makatuwang nina Amadou Ndiaye, Justine Baltazar at Brandon Bates sa kanilang tropa.

Kaya naman excited na si Green Archers head coach Derrick Pumaren sa laban ng kanyang bataan na nagnanais makabalik sa Final Four matapos mabigo noong Season 82.

Parehong kwalipikado sa Season 83 ang Phillips brothers.

Tuluy-tuloy ang rebuil-ding ng La Salle.

Una na nitong kinuha sina Jonnel Policarpio ng Mapua, Warren Calara ng Technological Institute of the Philippines, CJ Austria ng University of the East at Emman Galman ng University of Perpetual Help System Dalta.

Pasok na rin sina J­oshua Ramirez ng Colegio de San Juan de Letran Squires at dating San Beda University standout Evan Nelle.