Boxing practices papayagan na?
Sa mgcq areas lang
MANILA, Philippines — Posibleng makapagsimula na ng ensayo ang mga boxers sa oras na maaprubahan na ng Inter-Agency Task Force for the Management of Emerging Infectious Diseases ang kahilingan nito.
Ngunit nilinaw ng Department of Health (DOH) na tanging ang mga boksingero lamang na nasa lugar na nasa ilalim ng Modified General Community Quarantine (MGCQ) ang maaaring pahintulutan.
Kailangan din ng mga boxers, coaches at officials na sundin ang mga requirements ng IATF bago sumalang sa ensayo gaya ng coronavirus diseases (COVID-19) testing.
Ipatutupad din ang mahigpit na patakaran sa gagamiting training facilities tulad ng madalas na paglilinis sa mga equipment at pagsasailalim sa disinfection gaya ng ginagawa sa mga ospital.
Nakatakdang talakayin ang usapin sa boxing at iba pang sports sa susunod na pagpupulong ng IATF kasama ang DOH at iba pang sangay ng gobyerno partikular na ang GAB at Philippine Sports Commission.
Sinabi rin ni DOH Undersecretary Dr. Maria Rosario Vergeire na kailangang mapasama ang boxing sa Joint Administrative Order (JAO) na aprubado ng IATF bago mabigyan ng go signal ang ensayo ng mga boxers.
“Boxing included in areas under MGCQ, provided testing and quarantine protocols are followed and provided that it will be included in JAO. We need to include it in JAO,” ani Vergeire.
Tanging ensayo lamang ang papayagan. Wala pang boxing events o sparring ang maaaring ipatupad upang maiwasan ang pagkalat ng COVID-19.
Una nang pinahintulutan ng IATF ang Philippine Basketball Association (PBA) at Philippine Football League (PFL) para magsagawa ng ensayo kung saan tanging ang mga koponan lamang sa naturang liga ang maaaring sumalang sa workouts.
Nilinaw ng IATF na hindi pinapayagan ang mga basketball practices sa ibang liga, eskwelahan o mga barangay courts.
- Latest