Japeth nami-miss ang daily routine sa Ginebra
MANILA, Philippines — Kung dati ay araw-araw na nagkikita ang mga players ng Barangay Ginebra para mag-ensayo, ngayon ay hindi na ito nangyayari dahil sa coronavirus disease (COVID-19).
Ito ngayon ang hinahanap-hanap ni flying forward Japeth Aguilar.
“Nami-miss ko ‘yung mga teammates ko, sila coach Tim (Cone),” wika ng 6-foot-8 na Gin King. “Basta ‘yung mga daily routine, ‘yung gigising ka sa umaga, magpa-practice, and after practice, mag-workout.”
Sinuspindi ng PBA Board ang 45th Season noong Marso 11 matapos ilagay sa enhanced community quarantine (ECQ) ang National Capital Region dahil sa COVID-19 outbreak.
Tanging ang laban ng San Miguel at Magnolia ang nailaro sa 2020 PBA Philippine Cup na pinagwagian ng mga Beermen.
Ayon sa 33-anyos na si Aguilar, natuto ang mga tao na pahalagahan ang mga maliliit na bagay dahil sa COVID-19 pandemic.
“Iyong normal na routine na usually hindi natin pinapansin, pero ngayong community quarantine ‘yun ang mga nami-miss natin,” ani Aguilar.
Magdedesisyon ang PBA Board sa Agosto kaugnay sa naantalang Season 45.
- Latest
