Philsports hindi kasama--Velasco
Para gawing quarantine facility
MANILA, Philippines — Hindi kasama ang Philsports Complex sa Pasig City na gagamiting quarantine facility para sa mga pasyenteng tinamaan ng coronavirus disease (Covid-19).
Ito ang paglilinaw ni Philippine Sports Commission (PSC) national training director Marc Velasco dahil may ilang atleta ang nakatira sa naturang pasilidad kasama na si PSC chairman William “Butch” Ramirez na naninirahan sa isa sa mga dormitoryo doon.
“It’s not on the table. It wasn’t really on the agenda when we had the coordination meeting. We actually told them that the area may mga atleta na naka-house ngayon mga 30, of course si chairman Ramirez nandun din siya,” ani Velasco sa panayam ng Radyo Pilipinas.
Sinabi ni Velasco na tanging ang Rizal Memorial Sports Complex lamang ang gagamitin base na rin sa pakikipag-ugnayan ng PSC sa Department of Public Works and Highways (DPWH) at Department of Health (DoH).
Sa kasalukuyan, inaayos na ang Ninoy Aquino Stadium na kayang tumanggap ng mahigit 100 pasyente.
Pinag-aaralan na rin na gawing pasilidad ang Rizal Memorial Coliseum na may ilang metro lamang ang layo sa Ninoy Aquino Stadium.
Maliban sa Rizal Memorial Sports Complex, gagamitin na rin ang Philippine International Convention Center at World Trade Center sa Pasay City.
- Latest
