Countdown sa Tokyo Olympics muling binuksan

MANILA, Philippines  — Muling gumana ang countdown para sa Olympic Games na idaraos sa susunod na taon sa Tokyo, Japan.

Pormal nang inilabas ng International Olympic Committee (IOC) ang bagong petsa ng Olympic Games at Paralympic Games.

Nakatakda ang ope­ning ceremony ng Tokyo Olympics sa Hulyo 23, 2021 habang idaraos ang closing rites sa Agosto 8 - halos parehong petsa ng orihinal nitong schedule na July 24 hanggang August 9, 2020.

Gaganapin naman ang Paralympic Games sa August 24 hanggang September 5, 2021.

“Obviously in the summer there might be typhoons and the heat problems. However, this situation is the same. We always had those problems so we will be prepared for those issues,” ani Tokyo Olympics organizing committee president Yoshiro Mori.

Ngayong pormado na ang petsa ng Tokyo Olympics, panibagong training program ang ilalatag ng mga atleta at coaches para makuha ang peak form sa susunod na taon.

“I am confident that, working together with the Tokyo 2020 organizing committee, the Tokyo metropolitan government, the Japanese government and all our stakeholders, we can master this unpre­cedented challenge,” ani IOC chief Thomas Bach.

Hindi lang mga atleta at coaches, magiging abala rin ang Tokyo Olympics organizing committee sa pag-aasikaso sa schedu­ling partikular na sa hotel accommodations.

Maliban sa IOC at Tok­yo Olympics organizing committee, aayusin din ng iba’t ibang international fe­derations ang mga quali­fying tournaments na nauna nang nakansela dahil sa coronavirus disease (COVID-19) pandemic.

Ilan sa mga naudlot ang Olympic qualifying events sa boxing na idaraos sana sa Mayo sa Paris, France; taekwondo na lalaruin sana sa Hunyo sa Amman, Jordan; at ang 2020 World Karate Championships sa Hunyo na gaganapin din sa Paris, France.

Sa kasalukuyan, may apat na atleta na ang k­walipikado sa Tok­yo Olympics - sina world champion Carlos Edriel Yulo ng gymnastics, Southeast Asian Games pole vault record holder Ernest John Obiena ng athletics, at sina AIBA Men’s World Boxing Championship silver medalist Eumir Felix Marcial at SEA Games silver medalist Irish Magno ng boxing.

Inaasahang madadag­dagan pa ito sa ngalan nina Rio Olympics silver medalist Hidilyn Diaz ng weightlifting at four-time SEA Games champion Kiyomi Watanabe ng judo.