Caloocan humirit pa ng pag-asa

MANILA, Philippines — Hindi na pina-iskor ng Caloocan Supremos ang Muntinlupa Cagers sa huling apat na minuto upang itakas ang 63-62 panalo at manatiling buhay ang asam na playoff berth sa pagpapatuloy ng Chooks-to-Go-Maharlika Pilipinas Basketball League (MPBL) Lakan Cup sa Ynares Sports Center sa Antipolo City.

Umiskor si Paul Sanga ng walo sa huling 10 puntos ng Supremos upang manatili sa pang-siyam na puwesto sa 15-13 win-loss kartada at half-a-game lamang ang agwat mula 8th spot na ngayon ay hawak pa rin ng Pasay Voyagers sa 15-12 slate sa Northern Division.

Humataw si Sanga ng dalawang triples at dalawang free throws sa huling ratsada ng Supremos para lumapit sa playoff round.

Ngunit, malaking ha­mon para sa Caloocan ang susunod na laban kontra sa solo leader at Datu Cup champion San Juan Knights sa  Pebrero 4.

Sa iba pang laro, tinam­bakan ng Basilan Steel ang Rizal Xentro Mall Golden Coolers, 103-85, para lalong higpitan ang hawak sa third spot sa 18-10 card sa Southern Division.

Naka-eskapo rin ang Iloilo United Royals laban sa Biñan City Luxxe White Krah, 67-63, upang umakyat sa sosyohan sa ika-limang puwesto kasama ang Zamboanga Family Sardines sa parehong 17-11 slate sa South group.