Bucks sinuwag ang Celtics
MILWAUKEE -- Itinala ng Bucks ang kanilang pang-limang sunod na panalo matapos itumba ang Boston Celtics, 128-123.
Kumolekta ng 32 points, 17 rebounds at 7 assists ni star forward Giannis Antetokounmpo para sa NBA best record na 36-5 ng Milwaukee.
Ito ang pang-35 double-double ni Antetokounmpo ngayong season.
Tumipa naman si Khris Middleton ng 23 markers para sa Bucks, kinuha ang 76-58 abante sa halftime bago nakalapit ang Celtics sa 81-87 sa huling 5:16 minuto ng third period.
Isang 19-6 atake ang inilaglag ng Milwaukee patungo sa pagtatayo ng 127-123 bentahe sa natitirang 38 segundo sa fourth quarter.
Kumamada si Kemba Walker ng game-high na 40 points para pamunuan ang Boston, naglaro nang wala si Jaylen Brown na nagkaroon ng sprained right thumb sa nauna nilang 13-point loss sa Detroit Pistons noong Miyerkules.
Sa Los Angeles, naglista si Kawhi Leonard ng 32 points, 5 rebounds at 5 assists at nag-ambag si Montrezl Harrell ng 21 markers para akayin ang Clippers sa 122-95 panalo sa Orlando Magic.
Pinamunuan ni Nikola Vucevic ang Magic mula sa kanyang 22 points kasunod ang 20 markers ni Aaron Gordon.
Nabigo ang Orlando na maduplika ang pagpigil sa nine-game winning streak ng Los Angeles Lakers noong Miyerkules.
Sa San Francisco, nagsalpak si Malik Beasley ng dalawang free throws sa huling 8.9 segundo sa overtime para ihatid ang Denver Nuggets sa 134-131 paglusot sa Golden State Warriors.
Ipinalasap ng Nuggets, nakahugot kay Beasley ng 27 points, ang ika-10 sunod na kamalasan ng Warriors.
Humataw si Will Barton ng season-high na 31 points para sa pang-limang panalo ng Denver sa huling anim na laro.
- Latest