Giant Lanterns wagi sa Athletics
MANILA, Philippines — Binura ng Pampanga Giant Lanterns ang 15-point deficit patungo sa 82-79 overtime win kontra sa Batangas City Athletics sa Chooks-to-Go-Maharlika Pilipinas Basketball League (MPBL) Lakan Cup sa Angeles University Foundation Gym sa Angeles City.
Humataw sina Levi Hernandez at Larry Muyang ng 22-7 atake para itakas ang panalo ng Giant Lanterns at makisosyo sa Bataan Risers sa No. 5 spot sa pareho nilang 17-9 kartada sa Northern Division.
Umiskor ang dating Letran Knights center na si Muyang ng marginal basket sa huling segundo para burahin ang huling 79-79 pagkakatabla at panatilihing buhay ang pagpasok sa top four.
Sa panalo ng Giant Lanterns ay lumapit sila sa No. 4 team na Bulacan Kuyas na hawak ang 18-8 marka.
Tumapos si Hernandez na may 32 puntos, 4 rebounds at 2 steals, habang si Michael Juico ay nagtala ng 13 markers at 12 boards para sa Pampanga na nakamit ang ikaapat na sunod na panalo.
Nagtala naman si Muyang ng 9 points at 7 rebounds at may 7 markers at 20 boards si John Dexter Maiquez.
Sa iba pang laro, nagwagi ang Bulacan Kuyas laban sa Caloocan Supremos, 81-79, habang pinatumba naman ng Pasig-Sta. Lucia Realtors ang Imus Bandera, 93-88.
- Latest
