Lady Blazers itinumba ang Lady Pirates
MANILA, Philippines — Malakas na puwersa ang inilatag ng College of Saint Benilde sa huling sandali ng laro para itakas ang 23-25, 25-23, 23-25, 25-18, 15-7 panalo laban sa Lyceum of the Philippines University at sumalo sa liderato sa NCAA Season 95 women’s volleyball tournament kahapon sa The Arena sa San Juan City.
Ito ang ikalawang sunod na panalo ng Lady Blazers para saluhan ang nagdedepensang Arellano Lady Chiefs sa tuktok ng standings hawak ang magkatulad na 2-0 baraha.
Sa unang laro, nakabangon ang Colegio de San Juan de Letran sa masamang panimula para pigilan ang Emilio Aguinaldo College, 22-25, 25-10, 25-18, 25-13, at makuha ang kanilang unang panalo.
Nagpasabog si Chamberlaine Cunada ng 24 points mula sa 19 attacks, 3 aces at 2 blocks, habang nagsumite siya ng 17 excellent digs at 3 receptions.
“Medyo tensed sila sa umpisa ng laro. Pero bumalik naman ‘yung kumpiyansa ng mga bata sa second set,” ani Lady Knights coach Michael Inoferio.
Nakatuwang ni Cunada si Dane Ohya na nagtala ng 12 hits, 2 blocks at 1 ace at nagdagdag si Julienne Castro ng 11 markers.
Naramdaman din sina Khryss Anne Monteagudo at Daisy Melendres na may tig-walong puntos at team captain Charlemagne Simborio na nagdagdag ng anim na hits para sa balanseng atake ng Letran.
Tanging si Catherine Almazan lamang ang nagtala ng double digits para sa Lady Generals (0-1) mula sa kanyang 13 points.
Sa men’s division, nakabawi ang EAC nang ilampaso ang Letran, 25-19, 25-18, 25-17, para hablutin ang unang panalo.
Nakalikom sina Danrich Melad at Joshua Mina ng pinagsamang 31 points para sa Generals.
- Latest