Arnis, athletics pinaka-produktibong NSAs

CAPAS, Tarlac, Philippines – Matapos ang arnis, ang track and field team ang ikalawang National Sports Association na nagposte ng pinakamaraming gintong medalya sa katatapos na 30th Southeast Asian Games.

Nagtakbo ang Philippine Amateur Track and Field Association ng kabuuang 11 gold medal sa athletics competition ng ika-30 edisyon ng biennial event dito sa New Clark City Athletics Stadium.

Tinampukan ito ng tatlong bagong record mula kina Fil-American sprinter Kristina Knott, pole vaul­ters Ernest John Obiena at Natalie Rise Uy.

May kabuuang 12 gold medals ang arnis habang may 10 ang dancesports. Inangkin ni Knott ang gold medal sa women’s 200-meter dash sa kanyang bagong Philippine at SEA Games record na 23.01 segundo.

Nauna nang isinumite ng University of Miami standout ang bilis na 23.07 sa preliminaries para burahin ang eight-month record na 23.16 ni Zion Corrales-Nelson, nagbasura sa SEA Games record na 23.30 na itinayo ni Supavadee Kawpeag ng Thailand noong 2009.

Ang Fil-Canadian na si Corrales-Nelson ang tumabon sa 23.35 Philippine record ni legend Lydia De Vega noong 1986.

Nakasama rin si Knott kina Eric Cray, Eloiza Luzon at Anfernee Lopena sa pagkopo sa ginto sa mixed 4x100m relay.

Nagposte naman ang 23-anyos na si Obiena ng bagong SEA Games mark na 5.45m sa men’s pole vault.

Tinabunan ni Obiena, nauna nang nakakuha ng tiket para sa 2020 Olympic Games sa Tokyo, Japan, ang dating 5.35m ni Porranot Purahong ng Thailand noong 2017 SEA Games sa Malaysia.

Isang bagong SEA Games record din ang inilista ng 25-anyos na si Uy sa women’s pole vault nang lumundag ng 4.25m para sirain ang 4.21m ni Sukanya Chomchuendee na naitala noong 2013 SEA Games sa Myanmar.

Muli namang nagdomina si Cray sa men’s 400m hurdles event.

Nagtakbo din ng ginto sa kanilang mga events sina Christine Hallasgo (wo­men’s marathon), Clinton Bautista (men’s 110m hurdles), Aries Toledo  (men’s decathlon), Melvin Calano (men’s javelin throw, William Morrison III (men’s shot put) at Sarah Dequinan (women’s heptathlon).

Ang walong pilak ay ambag nina Knott (women’s 100m dash), Carter Lily (men’s 800m run, Mariano Masano (men’s 1500), William Morrison III (Men’s discus throw), Mark Harry Diones (men’s triple jump), Joida Gagnao (women’s 3000m steeplechase), Mary Joy Tabal (women’s marathon) at ang women’s 4x100 relay team nina Knott, Zion Nelson, Kayla Richardson at Kyla Richardson.

Ang siyam na tanso ay galing kina Gagno (wo­men’s 5,000m run), Sonny Wagdos (men’s 5,000m run), Janry Ubas (men’s decathlon), Robyn Brown (women’s 400m hurdles), ang 4x400 mixed relay team nina Brown, Reymond Alferos, Maureen Schrijvers at Edgardo Alejan Jr., ang men’s 4x100 relay squad nina Cray, Lopez, Bautista at Francis Medina, ang men’s 4x400 relay team nina Edgardo Alejano Jr, Michael Carlo del Prado, Frederick Ramirez at Joyme Sequita at ang women’s 4x400 relay team nina Schrijvers, Brown, Eloiza Luzon at Jessel Lumapas.